கற்பூரம்

1967யில் வெளிவந்த இப்படத்தைப் பார்க்கும் வாய்ப்பு எனக்கு இதுவரை கிட்டவில்லை.

இப்படத்தில் ஏ.வி.எம்.ராஜன், புஷ்பலதா, பாலையா, மணிமாலா, அசோகன், ஸ்ரீகாந்த், மனோரமாவுடன் சோவும் நடித்துள்ளார். சோவுடைய ஜோடி மனோரமா. சி.என்.ஷண்முகம் இயக்கம்.

உனக்கும் எனக்கும்

இப்படம் 1972யில் வெளியானது. என்.எஸ்.மணியம்  இயக்கத்தில், ஜெய்சங்கர், பாரதி , ஸ்ரீ வித்யா , வாசு, எம்.என்.ராஜம், மனோரமா, சுகுமாரி, தேங்காய் சீனிவாசன் ஆகியோருடன் சோவும் நடித்துள்ளார். நல்ல தம்பி என்ற கேரக்டரில் சோ நடித்துள்ளார். ஜெய்சங்கருக்கு வேலையாளாக வருகிறார். மனோரமா சோவுடைய ஜோடி.

திமிர் பிடித்த நாயகியிடம் சவால் போட்டு, அவர் வீட்டிலேயே டிரைவராக வேலை பார்த்து அவரைக் கரம் பிடித்து, அதன் பிறகு அக்குடும்பத்தில் நடக்கும் சில பிரச்சினைகளைத் தீர்க்கும் நாயகனின் கதை.

சோவின் நகைச்சுவை படத்தைப் போலவே சுமார்ரகம். 

ஆசீர்வாதம்

இப்படம் 1972யில் வெளியானது. ஆர். தேவராஜன் இயக்கத்தில், சுமாரான கதை; சுமாரான படம். ஆனால் முக்கியமான பாத்திரத்தில் நடித்துள்ள எஸ்.வி.சுப்பையா மிகவும் அருமையாக நடித்துள்ளார். சோவின் நகைச்சுவை ரசிக்கும்படியாக இருந்தாலும், அவர் சில காட்சிகளிலேயே தோன்றுகிறார். வேணு என்ற பெயரில் நாயகனுக்கு நண்பனாக வருகிறார்.

அநாதைப் பையனைச் செலவு செய்து படிக்க வைக்கிறார் ஆசிரியர் சுப்பையா. அச்சிறுவன் வளர்ந்த பின் ஜெய்சங்கர். நன்றாகப் படித்து பட்டம் வாங்குகிறார். படிக்காத ஆசிரியர் மகன் வாசு அவர் மீது பொறாமை கொள்கிறார். சந்தர்ப்ப வசத்தால் முதலாளி வி.எஸ். ராகவன் மகளான லட்சுமியைத் திருமணம் செய்து கொள்கிறார் ஜெய். தாம் ஏழை என்ற உண்மையை சில காரணங்களால் சொல்லாமல் மறைக்கிறார். அதைப் பயன்படுத்தி பணம் பறிக்கிறார் வாசு. அவர் எப்படி மனம் திருந்தினார், ஏழைகளை வெறுக்கும் லட்சுமி எப்படி திருந்தினார் என்பது மீதி கதை.

தேங்காய் சீனிவாசன், சி.ஐ.டி.சகுந்தலா, எம்.பானுமதி, சுருளிராஜன் போன்றோரும் படத்தில் உண்டு.