ஆலயம்

பீம்சிங் திரைக்கதை; திருமலை-மஹாலிங்கம் இயக்கம். வெளியான தேதி 11 ஆகஸ்ட் 1967. "நெஞ்சே நீ வாழ்க" என்ற நாடகத்தின் படமாக்கம்.

மேஜர் சுந்தர்ராஜன் நாயகன். நேர்மையான அவர் குடும்பத்தில் பண நெருக்கடி ஏற்படுகிறது. லஞ்சம் வாங்கலாமா என அவர் யோசிக்கும் அளவுக்கு நிலைமை மோசமாகிறது. ஆனால் அவர் நேர்மை தவறாமல் இப்படி நினைப்பு வந்ததற்காக தம்முடைய வேலையை ராஜினாமா செய்து விட்டு அலுவலகத்திலேயே இறந்தும் விடுகிறார்.

முழு கதையும் ஆபீஸில் நகர்கிறது. அந்த ஆபீசில் வேலை செய்பவர்களாக நாகேஷ், மனோரமா, சோ, கருணாநிதி, வி.கே.ராமசாமி, ஸ்ரீகாந்த் போன்றோர் நடித்துள்ளனர். நாடகத்திலும் படத்திலும் டைப்பிஸ்டாக வரும் கோபுவுக்கு டைப்பிஸ்ட் என்ற பட்டப் பெயரே வந்து விட்டது. சோ ரவி என்ற கதாபாத்திரத்தில் தோன்றுகிறார். அவரும் இதே ஆபிசில் வேலை செய்கிறார். கௌரவ வேடம். படம் முழுக்க கலகல என்று நகர்ந்தாலும் நினைவு கொள்ளும்படி நகைச்சுவை இல்லை. படமும் ஓரளவுக்குச் சுமார் ரகமே. 

நாடகமே உலகம்

கிருஷ்ணன் பஞ்சு இயக்கத்தில் 18 மே 1979யில் வெளிவந்த இப்படம் எப்படி படத்தை மோசமாக எடுக்க வேண்டும் என்பதற்கு உதாரணமாக விளங்கும் படமாகும். பெரிய இயக்குனர்கள் - பெரிய நடிகர்கள் - ஆனால் ஏன்  இப்படி ஒரு படம்?

கோடீஸ்வரர் சுந்தர்ராஜன்- எம்.என்.ராஜம் தம்பதியுடைய மகள்  கே.ஆர்.விஜயா இளகிய மனம் படைத்தவர். ஏழைகளுக்கு அள்ளித் தருபவர். ஒரு லட்சம் செலவழித்து தம்மிடம் வேலை பார்க்கும் ஜெயமாலினிக்குத் திருமணம் செய்து வைக்கிறார். அதனால் கோபம் கொள்ளும் சுந்தர்ராஜன் பெண்ணை வீட்டை விட்டு அனுப்பி விடுகிறார். அதே சமயம் தாம் அவருடைய சொந்தப் பெண் இல்லை என்ற உண்மையும் விஜயாவுக்குத் தெரிகிறது. தாம் உதவிய ஜெயமாலினி வீட்டிலேயே தங்குகிறார். அவர் வில்லன் நம்பியாருடன் சேர்ந்து கொண்டும் தம்முடைய கணவரான சரத்பாபுவைக் கொல்ல முயல்கிறார். அதை ஹீரோ மோகன்பாபு உதவியுடன் விஜயா தடுக்கிறார். இது தான் கதை. சோ ரத்தன் என்ற பெயரில் சேட் நம்பியாரின் வேலைக்காரராக வருகிறார். நகைச்சுவை சுத்தமாக எடுபடவில்லை. அவர் தோன்றும் காட்சிகளும் குறைவு.

மனோரமா, சி.ஐ.டி.சகுந்தலா, வெண்ணிறாடை நிர்மலா போன்றோரும் படத்தில் நடித்துள்ளனர். 

சக்கப் போடு போடு ராசா

எஸ்.பி.முத்துராமன் இயக்கம். வெளியான தேதி 15 செப்டம்பர் 1978.

சுமாரான படம். சோ-மனோரமா தோன்றும் காட்சிகள் மட்டுமே படத்தில் ரசிக்கும்படி உள்ளன. ஐயாசாமி என்ற பெயரில் நெல்லைத் தமிழில் சோ விளாசித் தள்ளுகிறார். படம் முழுக்க அவர் வருகிறார். அதுவே படத்தின் பலம். இதில் அரசியல் பேசவில்லை; உடல் மொழியில் சிரிக்க வைக்கவில்லை; நெல்லைத் தமிழில் கிண்டலாகவும், யதார்த்தமாகவும், அப்பாவித்தனமாகவும் பேசியே நம்மைச் சிரிக்க வைத்து விடுகிறார்.

ஜெய்சங்கர்-ஜெயசித்ரா  ஹனிமூனுக்காக ஒரு ஹோட்டலில் தங்குகிறார்கள். அதன் முதலாளி மேஜர் சுந்தர்ராஜன் கொள்ளைக்காரர். அவரை அவருடைய கையாளான ஸ்ரீகாந்த் கொன்று விடுகிறார். அதைப் பார்க்கும் ஜெயசித்ரா போலீசில் சொல்ல, நிரூபணம் இல்லாததால் வில்லன்கள் தப்பிக்கின்றனர். பின்பு அவர்களே தேங்காய் சீனிவாசனைக் கொன்று அப்பழியை ஜெயசித்ரா மீது சுமத்துகின்றனர். ஜெய்சங்கர் எப்படி உண்மையைக் கண்டுபிடித்து தம்முடைய மனைவியை மீட்டார் என்பதே மீதி கதை.

கமல்ஹாசன், படாபட் ஜெயலட்சுமி, சுருளி ராஜன், தங்கவேலு, கண்ணன், வெண்ணிறாடை மூர்த்தி, உசிலை மணி, எஸ்.எஸ்.சந்திரன், டைப்பிஸ்ட் கோபு, அசோகன் போன்றோரும் படத்தில் நடித்துள்ளனர். 

அவன் ஒரு சரித்திரம்

"வணக்கம் பல முறை சொன்னனேன்" உட்பட கண்ணதாசன் கற்பனையில் எம்.எஸ்.விசுவநாதன் இசையில் அருமையான பாடல்கள். சிவாஜியின் பிரமாதமான நடிப்பு, காஞ்சனாவின் சிறந்த நடிப்பு, நல்ல கதை என பல நல்ல அம்சங்களைக் கொண்ட இப்படம் கே.எஸ்.பிரகாஷ் ராவ் இயக்கத்தில் 14 ஜனவரி 1977யில் வெளியானது.

படம் நன்றாக இருந்தாலும் நகைச்சுவைக் காட்சிகள் நன்றாக அமையவில்லை. ராமு என்ற அசட்டு கேரக்டர் சோவுக்கு. அவருடைய தந்தையாக வி.கே.ராமசாமியும், சிற்றன்னையாக மனோரமாவும், மனோரமாவுடைய தந்தையாக தங்கவேலுவும் நடித்துள்ளனர். இவர்கள் எல்லாரும் வில்லத்தனமான காமெடியன்கள். இத்தனை பேர் இருந்தும் நமக்குச் சிரிப்பு வரவில்லை. சோவுடைய கேரக்டர் மிகவும் வீக். இப்படத்தை அவர் தவிர்த்திருக்கலாம். எம்.பானுமதி அவருக்கு ஜோடி.

சிவாஜி பெரிய பணக்காரர். அவருடைய தந்தை பகவதி; தாய் பண்டரிபாய். சிவாஜி படித்து கலெக்டராகிறார். அகிம்சை வழியில் நேர்மையாக இருக்கும் அவருக்குப் பல சோதனைகள் வருகின்றன. அவற்றையெல்லாம் அவர் எப்படி வெற்றி கண்டார் என்பதே கதை. அவருக்கு உறுதுணையாக காஞ்சனாவும், ஜோடியாக மஞ்சுளாவும் நடித்துள்ளனர். தீவிரவாதியாகவும் அவருடைய தம்பியாகவும் ஸ்ரீகாந்த் நடித்துள்ளார். 

உண்மையே உன் விலை என்ன? திரைப்படம்

1974யில் மேடையேற்றப்பட்ட "உண்மையே உன் விலை என்ன" என்ற நாடகத்தின் படமாக்கம். 30 ஏப்ரல் 1976யில் வெளியானது. கதை-வசனம்-இயக்கம் சோ.

ஒரு பாதிரியார்; அவரிடம் பாவ மன்னிப்பு கோர ஒருவன் வருகிறான். ஒரு பெண்ணின் கற்பைக் காப்பாற்ற அவன் செய்த கொலை தவறில்லை எனக் கருதும் பாதிரியார் அவனை மறைத்து வைக்கிறார். ஆனால் எப்போதும் உண்மை மட்டுமே பேசுகிறார்; அதனால் போலீசில் மாட்டிக் கொள்கிறார். அவரை விடுவிக்க ஒரு வக்கீல் வருகிறார். பொய் பேச மறுத்து, அந்த வக்கீலுக்கும் பெரிதாகப் பாதிரியார் ஒத்துழைக்கவில்லை. இந்த நிலையில் அதிர்ஷ்டவசமாக உண்மை என்ன என்பதற்கு சில சாட்சிகளும் ஆவணங்களும் கிடைக்கின்றன. கொல்லப்பட்டவனுடைய தந்தை அரசியல்வாதி. அவர் எல்லாரையும் விலை பேசி உண்மையை வாங்கி விடுகிறார். பாதிரியாருக்கு உதவியாக இருந்த வக்கீல், நண்பர், பாதிக்கப்பட்ட பெண் என எல்லாருமே விலை போகிறார்கள். ஆனால் கடைசியில் வேறு ரூபத்தில் உண்மை வெளிவருகிறது. அதை ஊருக்கு எல்லாம் தெரிய வாய்த்து அரசியல்வாதியின் கையால் இறந்து போகிறார் பாதிரியார்.

மேலே கொடுக்கப்பட்டது தான்  நாடகத்தின் மூலக்கதை. படத்தில் சில மாற்றங்கள். அரசியல்வாதிக்குப் பதிலாக பெரும் பணக்காரர். பத்திரிகையாசிரியர், அவருடைய மகள், பத்திரிகை நிருபர் எனச் சில புதிய பாத்திரங்கள். அந்த இரண்டு பாத்திரங்களும் பாதிரியாருக்கு உதவியாக வருகின்றனர். வக்கீலுடைய மகனை ஏன் பணக்காரரால் விலைக்கு வாங்க முடியவில்லை என்பதிலும் சில மாற்றங்கள். அவருடைய காதலியாக பத்திரிகையாசிரியர் மகள். இருவரும் திருமணம் செய்து கொள்கின்றனர். அதுவும் நாடகத்தில் கிடையாது. இதைத்தவிர க்ளைமாக்ஸும் சில மாற்றங்களுக்கு உட்பட்டுள்ளது. கோர்ட்டில் பாதிரியார் சுடப்படுகிறார், நாடகத்தில் வருவதைப் போல சர்ச்சில் அன்று.

பாதிரியாராக முத்துராமன். அமைதியான முகம்; சாந்தமான நடிப்பு. அப்படியே ஒரு உண்மையான பாதிரியைப் பார்ப்பதைப் போலவே உள்ளது. வில்லனாக அசோகன். வக்கீலாக சோ. சத்தியநாராயணா எனப் பெயர். தெலுங்கும் தமிழும் கலந்து பேசுகிறார்; நம்மை வயிறு நோக அடிக்கிறார். அவருடைய மனைவியாக சுகுமாரியும் மகனாக ஸ்ரீகாந்தும் நடித்துள்ளனர். பாதிக்கப்படும் பெண்ணாக சி.ஐ.டி.சகுந்தலாவும் அவருடைய கணவராக தேங்காய் சீனிவாசனும். கொலை செய்யும் டிரைவராக விஜயகுமார், பத்திரிகை ஆசிரியர் நீலு, அவருடைய மகள் பத்மப்ரியா, முக்கிய பாத்திரத்தில் நிருபராக மனோரமா, விஜயகுமாருக்கு அடைக்கலம் கொடுக்கும் முருகன் பக்தராக வி.கே.ராமசாமி என எல்லா நடிகர்களும் நிறைவாக நடித்துள்ளனர்.

நாடகத்தின் பாணியில் இருந்தாலும் நல்ல படம். 

அன்னப்பூரணி

1978யில்  வெளியான இப்படத்தை இயக்கியவர் பஞ்சு-கிருஷ்ணன. 

பணக்காரர் வீட்டில் வளரும் அனாதைப் பெண்ணான கே.ஆர்.விஜயா பெரியவரானவுடன், அக்குடும்பத்தின் ஊதாரிப் பிள்ளையான ஸ்ரீகாந்த் கெட்டுப் போகாமல் காத்து வருகிறார். இதற்கிடையே முத்துராமனைக் கல்யாணம் செய்து கொள்கிறார். வில்லன் மேஜர் சுந்தர்ராஜனால் கணவர் மீது விழும் கொலைப் பழியை எப்படி துடைக்கிறார் என்பது மீதிக் கதை. 

மொத்தத்தில் அலுப்பு தட்டும் கதை, வசனம், நடிப்பு. படத்தின் ஒரே ஆறுதல் சோவுடைய அரசியல் வசனங்கள். அதுவும் காலட்சேபம் செய்கிறேன் என அரசியலையும் சினிமாவையும் தாக்கும் காட்சி பிரமாதம். ஆங்கிலோ இந்தியனான மனோரமா சோவுக்கு ஜோடி; நீலு மாமனார்.

 

பலப் பரீட்சை

முக்தா சீனிவாசன் இயக்கத்தில் 1977யில் வெளியான இப்படத்தில் முத்துராமன், சுஜாதா, தேங்காய் சீனிவாசன், ஒய்.ஜி. மஹேந்திரன், மேஜர் சுந்தர்ராஜன், வி.கோபாலகிருஷ்ணன், பகோடா காதர், மனோரமாவுடன் சோவும் நடித்திருந்தார்.  மனோரமா ஜோடி. ஒய்.ஜி.யம் சுஜாதாவும் அவருடைய மக்கள்.

நடுத்தர வர்க்கத்தைச் சேர்ந்த கணவனுக்கும் மனைவிக்கும் பணம் சம்பாதிக்கும் விஷயத்தில் நடக்கும் உரசல்களைப் பற்றிய படம். கதை, திரைக்கதை, நடிப்பு, நகைச்சுவை என எல்லா விஷயங்களும் சுமார். அதுவும் சோ, ஒய்.ஜி, மனோரமா, தேங்காய் ஆகியோர் இணைந்து காமெடி என நினைத்து அசடு வழிகிறார்கள். சோவின் தேவையில்லாத படங்களில் இதுவும் ஒன்று. 

மேயர் மீனாட்சி

மே 1976யில் மதுரை திருமாறன் இயக்கத்தில் வெளியான படமிது. கே.ஆர்.விஜயா நாயகி. வீட்டு வேலை செய்பவர் வில்லன்களை உள்ளே தள்ள தேர்தலில் நின்று மேயராகும் கதை. ஜெய்சங்கர், வி.கே.ராமசாமி, விஜயகுமார், ஸ்ரீப்ரியா, தேங்காய் சீனிவாசன், மனோரமா, பகவதி, சுருளி ராஜன் போன்றோருடன் சோவும் நடித்துள்ளார். அவருக்கு வக்கீல் வேடம். நாயகிக்கு உதவியாக வருகிறார். அப்புசாமி எனப் பெயர். மனோரமா ஜோடி. அவர் தோன்றும் காட்சிகள் நன்றாக இருந்தாலும் படம் அறுவை என்பதால் அவர் காட்சிகளும் எடுபடவில்லை.

ரோஜாவின் ராஜா

15 டிசம்பர் 1976யில் வெளியான இப்படத்தை இயக்கியவர் கே.விஜயன். மருந்துக்குக் கூட நல்ல விஷயம் எதுவும் இப்படத்தில் இல்லை.

சிவாஜி, சோ, ஏ.வி.எம்.ராஜன் எல்லோரும் கல்லூரி மாணவர்களாக வருவது சிரிப்பை வரவழைக்கிறது. ஸ்ரீகாந்த் அவர்களுடைய நண்பர். சிவாஜி ஏழை; ராஜன் பணக்காரர். ஏழை என்பதனால் அவருடைய காதலியான வாணிஸ்ரீயை அவருடன் சேர விடாமல் செய்கின்றனர். பின் அவர் தம்முடைய நண்பன் ராஜனுக்காக காதலியைத் தியாகம் செய்ய, அவர் அம்மா இறக்க, அவர் பித்து பிடித்து அலைகிறார். உண்மை அறியும் ராஜன் நண்பனைத் தேடித் கண்டுபிடித்து அவரை குணமாக்கி, வாணிஸ்ரீயையும் ஒப்படைக்கிறார்.

மேஜர் சுந்தரராஜன், மனோகர், நீலு, சோ, மனோரமா, ஜி.வரலட்சுமி, சுகுமாரி, வி.கே.ராமசாமி எனப் பல பெரும் நடிகர்கள் நடித்திருந்தும் யாரையும் இயக்குனர் நன்றாகப் பயன்படுத்தவில்லை.

சோவுக்கு இரட்டை வேடம். அப்பா-மகன். மகன் பெயர் ஜம்பு. இருவருமே மொட்டை. இருவரில் யார் தம்முடைய  கணவர் எனத் தெரியாமல் அவ்வப்போது மனோரமா தவிக்கிறார். அதுதான் நகைச்சுவை. சோவுக்கு இப்படம் தேவையா?

சொந்தங்கள் வாழ்க

மதுரை திருமாறன் இயக்கத்தில் 1975யில் வெளியான இப்படத்தில் ஜெய்சங்கர், ஜெயசித்ரா, விஜயகுமார், மனோரமா, தேங்காய் சீனிவாசன், மேஜர் சுந்தர்ராஜன், வி.கே.ராமசாமி, சுருளி ராஜன், எம்.என்.ராஜம், டைப்பிஸ்ட் கோபு,  ஆகியோருடன் சோவும் நடித்திருந்தார்.

ஜெய்சங்கர் வில்லத்தனம் கலந்த ஹீரோ. அவரும் ஜெயசித்ராவும் கல்லூரித் தோழர்கள். ஒரு ஊரைச் சேர்ந்தவர்கள். பஞ்சாயாத்துத் தேர்தலில் போட்டியிடும் மேஜர் சுந்தர்ராஜன் மீது அநாவசியப் பழி போட்டு தம்முடைய தந்தையான வி.கே.ராமசாமியை ஜெயிக்க வைக்கிறார் ஜெய். அதற்குப் பழிவாங்க அவரைக் காதலிப்பதைப் போல நடித்து ஏமாற்றுகிறார் ஜெயசித்ரா. சில காரணங்களால் அவர்கள் இருவரும் திருமணம் செய்து கொள்கின்றனர். எப்படி மனதளவிலும் இணைந்தார்கள் என்பதே மீதி கதை.

 படம் சுமார்; நடிப்பும் வசனமும் சுமார். ஆனால் சோ வரும் காட்சிகள் மட்டும் அருமையாக உள்ளன. அவர் சொந்த பாணியில் அரசியல் வசனம் பேசி வெளுத்து வாங்குகிறார். செட்டியார் என்ற கேரக்டர். கோயம்புத்தூர் பாஷை பேசுகிறார். மனோரமா ஜோடி. 

 

 

அந்தரங்கம்

முக்தா சீனிவாசன் இயக்கத்தில் 27 நவம்பர் 1975யில் வெளியான இப்படம் சுமார் ரகம். கமல்ஹாசன் நாயகன். தீபா அறிமுகமான படம்.

மேஜர் சுந்தர்ராஜன் தம்முடைய மனைவியான சாவித்ரி மீது கோபம் கொண்டு வீட்டிலேயே ஒதுக்கி வைத்திருப்பார். தம்முடைய மகளான தீபா திருமணம் முடிந்தவுடன் சாவித்ரியை விவாக ரத்து செய்வது மேஜரின் முடிவு. இதைத் தெரிந்து கொண்ட தீபா தாம் காதலிக்கும் கமலைத் திருமணம் செய்ய மறுத்து விடுகிறார். கமல் காரணத்தைக் கண்டுபிடிப்பதோடு மேஜரையும் சாவித்ரியையும் சேர்த்தும் வைக்கிறார். இடையில் வில்லன் கூட்டத்துடன் சண்டையும் போடுகிறார்.

"ஞாயிறு ஒளி மழையில்" சிறந்த பாடல். வி.கோபாலகிருஷ்ணன், காத்தாடி ராமமூர்த்தி எனப் பலரும் நடித்துள்ளனர்.

சோ, தேங்காய் சீனிவாசன், சுகுமாரி, மனோரமா ஆகியோரின் கூட்டணியில் நகைச்சுவைக் காட்சிகள் பிரமாதமாக வந்துள்ளன. சோ தஞ்சாவூர் தங்கமணி என்ற கேரக்டரில் வருகிறார். தஞ்சாவூருக்கு வக்காலத்து வாங்கும் கேரக்டர். அலட்டாமல் அருமையான நடிப்பு. வெளுத்து வாங்குகிறார். 

சினிமாப் பைத்தியம்

31 ஜனவரி 1975யில் வெளியான இப்படத்தை இயக்கியவர் முக்தா சீனிவாசன். ஒரு ஹிந்தி படத்தின் ரீமேக். சுவாரசியமான படம். சினிமா பைத்தியம் பிடித்து அலையக் கூடாது என்பதையும், சினிமா நடிகர்கள் எதையும் மிகைப்படுத்தி செய்வார்கள் என்பதையும் எடுத்துரைக்கும் படம். ஜெய்சங்கர் நாயகனாக நடித்துக் கொண்டிருந்த காலத்தில் தம்முடைய இமேஜைப் பற்றி சற்றும் கவலையில்லாமல் நடிகர் ஜெய்சங்கராகவே நடித்துள்ளார். அவரை விட வில்லன் நடிகர் பலசாலி, அவரை விட ஒரு துணை நடிகர் நல்ல உடல்கட்டு உடையவர், அவர் 500 ரூபாய் தர்மம் செய்தால் அவருடைய உதவியாளர் அவர் ஐயாயிரம் உதவி செய்ததாக செய்தி வெளியிடுவது, தம்முடைய மகளுக்குத் திருமணம் செய்து வைக்குமாறு உதவி கேட்டு வரும் பெண்ணுக்குப் புத்திமதி கூறி ஊர் போய்ச் சேர பணம் கொடுத்தனுப்புவது எனப் பல காட்சிகள். அவரைத் தவிர கண்டிப்பாக எந்த நடிகரும் இப்பத்திரத்தில் நடிக்க சம்மதித்திருக்க மாட்டார்கள். அவர் உண்மையில் பாராட்டுக்குரியவர்.

ஜெய்சங்கர் மீது உயிர் விடுமளவு ரசிகையான ஜெயசித்ரா தம்முடைய முறைப் பையனான கமலைத் திருமணம் செய்து கொள்ள மறுக்கிறார். ஜெய்யையே மணம் செய்ய கனவு காண்கிறார். சினிமா உலகம் உண்மையில்லை என்பதை ஜெய் அவருக்குப் புரிய வைப்பதே கதை.

சிவாஜி கணேசன், ஜெயலலிதா, பாலாஜி, பி.மாதவன் உட்பட பலர் கௌரவ நடிகர்களாக நடித்துள்ளனர். இவர்களைத் தவிர மேஜர் சுந்தர்ராஜன், சௌகார் ஜானகி, சச்சு, மனோரமா, வி.கே.ராமசாமி போன்றோரும் நடித்துள்ளனர்.

சோ ரமணி என்ற கேரக்டரில் ஜெய்க்கு உதவியாளராக வருகிறார். சற்றும் அலட்டிக் கொள்ளாத பாத்திரம். கலகலப்புக்குச்  சற்றும் பஞ்சமில்லை. இல்லாததையும் பொல்லாததையும் சொல்லி ஜெய்க்கு இவர் விளம்பரம் தேடித் தருவது நல்ல வேடிக்கை. கமலுடன் சோ நடித்த முதல் படமிது.

மேல் நாட்டு மருமகள்

ஏ.பி.நாகராஜன் இயக்கத்தில் 10 மே 1975யில் வெளியான இப்படம் சுமார் ரகம். இதில் சோ கௌரவ வேடத்தில் சேட்டாக வருகிறார். அவருடைய மனைவியாக மனோரமா. அவரும் கௌரவ வேடம். தேவையற்ற படம். ஒரே காட்சி - அதுவும் மனத்தில் நிற்கவில்லை.

வெளிநாட்டுக்குப் படிக்க போகும் சிவகுமார் பிரென்ச் நாட்டு லாரன்சை மணந்து கொண்டு வருகிறார். அவரையே மணம் செய்து கொள்ள காத்திருக்கும் ஜெயசுதா அவருடைய தம்பி கமல்ஹாசனை மணந்து கொள்கிறார். வெளிநாட்டுப் பெண்மணி இந்திய கலாச்சாரப்படி வாழ, கமலும் ஜெயசுதாவும் மேல்நாட்டு நாகரீகத்தில் திளைக்கின்றனர். கடைசியில் அவர்கள் மனம் திருந்தி இந்திய கலாசாரத்தை அனுசரிப்பதாக கதை.

ஜுனியர் பாலையா, பூர்ணம் விஸ்வநாதன், வாணி கணபதி, உஷா உதூப், காந்திமதி, ராமதாஸ்  ஆகியோரும் நடித்துள்ளனர். 

உங்க வீட்டுக் கல்யாணம்

சித்ரமஹால் கிருஷ்ணமூர்த்தி இயக்கத்தில் 1975யில் வெளிவந்த இப்படம் முழு நீள நகைச்சுவைப் படம். தேங்காய் சீனிவாசன் நகைச்சுவை நாயகன். சுபா நாயகி. சோ மணி என்ற அசட்டு கேரக்டர். நாயகியுடைய அண்ணனாக வருகிறார். அவருக்கு ஜோடியாக மனோரமா. படத்தில் பெரிய காமெடி நடிகர்கள் பட்டாளமே இருந்தாலும் சிறிது கூட சிரிப்பு வரும்படி ஒரு காட்சியும் இல்லை. அவ்வப்போது சோ அரசியல் பேசினாலும் அது அவர் ஏற்கனவே அரைத்த மாவு.

தங்கவேலு பணக்காரர். அவருடைய மகள் சுபா தேங்காய் சீனிவாசனைக் காதலிக்கிறார். சீனிவாசன் கொள்ளைக்காரன் வேடத்தில் தங்கவேலு வீட்டில் தங்குகிறார். உண்மையான கொள்ளைக்கூட்டமே உள்ளே நுழைய, அவர்களிடமிருந்து எல்லோரும் எப்படி தப்பித்தனர் என்பதே கதை.

வெண்ணிறாடை மூர்த்தி, வி.கோபாலகிருஷ்ணன், ஜோதி லட்சுமி எனப் பலரும் நடித்துள்ளனர்.

இதயம் பார்க்கிறது

ஜெய்சங்கரின் 100ஆவது  படம். ஜகந்நாதன் இயக்கம்; 1974 வெளியீடு. அளவிட முடியாத அளவுக்குப் போர். சோ தோன்றும் சில நகைச்சுவைக் காட்சிகள் மட்டுமே படத்தில் ஓரளவுக்கு நன்றாக உள்ளன. சோவுக்குப் புரோக்கர் பரமசிவம் என்ற பாத்திரம். கௌரவ வேடம்; மனோரமா ஜோடி.

ஜெய்சங்கர்-ஜெயசித்ரா காதலர்கள். ஜெயசித்ரா வெளிநாட்டுக்குப் படிக்க சென்று விடுகிறார். ஒரு விபத்தில் ஜெய்க்குக் கண்பார்வையும் ஒரு கையும் விளங்காமல் போய் விடுகிறது. ஒரு கொள்ளைக்கார கும்பலிடம் மாட்டிக்கொள்ளும் ஜெய் எப்படி மீண்டார் என்பதே கதை. தேங்காய் சீனிவாசனும் ஸ்ரீகாந்தும் வில்லன்கள். மேஜர் சுந்தர்ராஜன், நீலு போன்றோரும் படத்தில் உண்டு.

மகளுக்காக

1974யில் எம்.கிருஷ்ணன் இயக்கத்தில் வெளிவந்த இப்படத்தில் சோவுக்குக் கௌரவ வேடம். ஹுசைனி என்ற கைதி; நாயகனுக்கு உதவி செய்து அவர் சிறையில் இருந்து தப்பிக்க உதவுகிறார். நகைச்சுவை என்று பெரிதாக எதுவும் இல்லை. சோ மட்டுமில்லை; இப்படத்தில் ரவிசந்திரன், விஜயகுமாரி, மனோரமா, அசோகன், தேங்காய் சீனிவாசன், சுருளி ராஜன் எனப் பலருக்கும் கௌரவ வேடங்கள்.

ஏ.வி.எம்.ராஜன் ஒரு சிறிய தகராறில் அடுத்த வீட்டுக்காரரான கண்ணனைக் கொலை செய்து தலை மறைவாகிவிடுகிறார். அவருடைய மனைவி விஜயகுமாரி இறந்து விட, அவருடைய பெண் குழந்தை ஏழை தேங்காய் சீனிவாசனிடம் வளர்கிறாள். அவருடைய நண்பனான எம்.ஆர்.ஆர். வாசு தாம் அப்பெண்ணை வளர்ப்பதாகப் பொய் சொல்லி ராஜனைக் கொள்ளையிட வைத்து அவ்வப்போது பணம் பறிக்கிறார். ஒரு கட்டத்தில் தம்முடைய மகளைப் பார்க்க ராஜன் வர, அவரைப் போலீசில் மாட்டி விடுகிறார் வாசு. சிறையிலிருந்து தப்பிக்கும் ராஜன் தம்முடைய மகளான ஜெயா வீட்டில் மறைந்து இருக்கிறார். போலீசாரின் உதவியோடு ராஜனைச் சுடுகிறார். ராஜன் மகள் மடியில் உயிர் விடுகிறார். அவர் உயிர் விடும் தருணத்திலேயே மகளுக்கு உண்மை தெரிகிறது. 

ஒண்ணே ஒண்ணு கண்ணே கண்ணு

ரா. சங்கரன் இயக்கத்தில் 1974யில் வெளியான இப்படத்தில் சிவகுமார், ஜெயசித்ரா, வி.எஸ்.ராகவன், ஸ்ரீகாந்த் போன்றோருடன் சோவும் நடித்துள்ளார். பரந்தாமன் என்ற கேரக்டர். படமும் நகைச்சுவையும் சுமார் ரகம். அவ்வப்போது அண்ணா அண்ணா எனக் கூப்பிட்டு தி.மு.க.வைத் தாக்குகிறார். டெல்லி குமார் அறிமுகம் இப்படத்தில். அவர் சோவுடைய அண்ணன். மனோரமா ஜோடி. சுருளி ராஜன் மகன்.

கதை, திரைக்கதை, வசனம் எல்லாமே சுமார் ரகம் இப்படத்தில். பணக்கார டெல்லி குமாருடைய இறந்து போன தம்பி மகள் ஜெயசித்ரா. அவருடைய செல்ல மகள். அவருக்கு இன்னொரு தம்பியான சோ குடும்பத்தையும், தங்கையான பண்டரி பாயையும் பிடிக்காது. பண்டரிபாயுடைய மகன் சிவகுமார் ஜெயசித்ராவைக் காதலிக்கிறார். ஒரு விபத்தில் அவர் கண் பார்வை பறி போக, அவரை குமாரின் எதிர்ப்பை மீறித் திருமணம் செய்து கொள்கிறார் ஜெயசித்ரா. அதனால் குமாருடன் அவருக்குப் பேச்சு வார்த்தை நின்று விடுகிறது.

கடன் தொல்லையால் சோ தலை மறைவாகிவிட, அவருடைய குடும்பம் குமார் வீட்டில் தஞ்சம் புகுகிறது. ஒரு கட்டத்தில் சில காரணங்களால் தாம் இறந்து விட்டதாகவும் முதலில் யாருக்குக் குழந்தை பிறக்கிறதோ அவர்களுக்கே தமது சொத்து என அவர் உயில் எழுத, சுருளியும், வயதான மனோரமாவும் முதலில் குழந்தை பெற போட்டி போடுகின்றனர். கடைசியில் சிவகுமார் கண் பார்வை கிடைக்க, அவர்களே உத்தமர்கள் என குமார் உணர, படம் முடிகிறது.

ஸ்ரீ தேவி கருமாரி அம்மன்

வியட்நாம் வீடு சுந்தரம் இயக்கத்தில் 1974, 13 நவம்பரில் வெளிவந்த இப்படம் கே.ஆர்.விஜயா நடித்த அம்மன் படம். இக்காலக்கட்டத்தில் வந்த சாமி படங்களைப் போல இதிலும் பல கிளைக் கதைகள்; பல நட்சத்திரங்கள். சுமாரான கதை-திரைக்கதை-காட்சி அமைப்பு.

ஜெமினி கணேசன், பேபி ஸ்ரீதேவி, வி.கோபாலகிருஷ்ணன், மேஜர் சுந்தர்ராஜன், வரலட்சுமி எனப் பலரும் நடித்துள்ளனர்.

தங்கவேலு, சுருளி ராஜன், மனோரமா நடித்துள்ள ஒரு பகுதியில் சிறு வேடத்தில் சோ. சந்தர்ப்பம் கிடைக்கும் போது இங்கும் அரசியல் பேசுகிறார். இவருக்கு இது தேவையில்லாத படம்.

தங்கப் பதக்கம்

செந்தாமரையின் நாடகத்தை சில மாற்றங்களுடன் சிவாஜி கணேசன் மேடையேற்றினார். பிறகு அவரே அதைத் திரைப்படமாகவும் எடுத்தார். அது தான் தங்கப் பதக்கம். பி. மாதவன் இயக்கத்தில் 1 மார்ச் 1974யில் இப்படம் வெளியானது.

மொத்தத்தில் நல்ல படம். போலீஸின் கம்பீரத்துடன், தந்தையின் பாசத்தையும் அருமையாக நடித்துக் காட்டுகிறார் சிவாஜி. இது கண்டிப்பாக அவருடைய சிறந்த படங்களில் ஒன்று. மற்ற நடிகர்களும் இயல்பான நடிப்பில் படத்துக்குப்  பலம் சேர்க்கிறார்கள்.

நேர்மையான போலீசுக்காரருக்கு நேர்மையற்ற திருட்டு மகன். அவனைக் கடைசி வரை திருத்த முடியாமல் போகிறது. கடைசியில் அவன் நாட்டுக்கே துரோகம் செய்யத் துணியும் போது, தனது கையாலேயே அவனை அந்த போலீஸ்காரர் சுட்டுக் கொள்கிறார்.

சிவாஜி காதல் காட்சிகளில் குழைவது அவருடைய கம்பீரத்தைக் குறைக்கிறது. செளத்ரி என்று தமிழ்நாட்டில் யாருக்குப் பெயர் இருக்கும்? அதையும் ஒவ்வொருவரும் ஒவ்வொரு மாதிரி அப்பெயரை உச்சரிக்கின்றனர். வில்லன் படிப்படியாக எப்படி உயர்ந்து நாட்டு ரகசியங்களை வெளிநாட்டுக்கு விற்கும்படி வளர்ந்தார்? எதுவும் நம்பும்படி இல்லை.

காமெடி தனி டிராக். சோவுக்கு இரண்டு வேடங்கள் - அண்ணனாக நேர்மையான போலீஸ் சுந்தரம், தம்பியாக அடாவடி அரசியல்வாதி வையாபுரி என்ற வைகை வளவன். அண்ணன் கேரக்டரைப் பற்றி சொல்ல ஒன்றும் இல்லை. வைகை வளவனாகப் பின்னி எடுக்கிறார் சோ. முக்கியமாக இப்படத்தில் எம்.ஜி.ஆரை நிறைய தாக்குகிறார்.

சோ இதில் அப்பாயிசம் என்ற கொள்கையை அறிமுகப்படுத்துகிறார். அது என்னவென புரியவில்லையே என்று ஒருவர் சொல்ல, அதுதான் அப்பாயிசம் என்கிறார் சோ. நியாயம், நேர்மை, நாணயம் என தி.மு.க.வின் கடமை, கண்ணியம், கட்டுப்பாட்டையும் கிண்டலடிக்கிறார். தம்பியாக வரும் சோ அடிக்கடி அண்ணா என்று அழைக்கிறார். ஏன்டா அண்ணன் பெயரைக் கெடுக்கிறாய் என அண்ணனாக வரும் சோ கிண்டலடிக்கிறார். இப்படி படத்தில் நிறைய அரசியல் வசனங்கள்.  குறிப்பாக,மேடையில் அவர் பேசும் வசனங்கள் ஏ க்ளாஸ். சந்தேகமின்றி இது சோவுடைய முக்கியமான படம். பட்டையைக் கிளப்புகிறார்.

சோவுக்கு ஜோடியாக மனோரமாவும் புஷ்பமாலாவும் நடித்துள்ளனர்.

சிவாஜியைத் தவிர, கே.ஆர்.விஜயா, ஸ்ரீகாந்த், பிரமிளா, வி.கே.ராமசாமி, மேஜர் சுந்தர்ராஜன், மனோகர், சுருளி ராஜன் போன்றோரும் இப்படத்தில் நடித்துள்ளனர்.

எம்.எஸ். இசையில் பாடல்கள் எல்லாம் சூப்பர்.

ரோஷக்காரி

மஹாராஜபுரம் சந்தானத்தின் கணீரென்ற குரலில் பாசுரத்துடன் படம் ஆரம்பிக்கிறது. எஸ்.வி.சுப்பையாவின் தேர்ந்த நடிப்பும் நம்மை மறக்கச் செய்கின்றன. ஆனால் போகப் போக படம் தடம் புரண்டு போய் விடுகிறது. கதை, திரைக்கதை, இயக்கம் எல்லாமே மதுரை திருமாறன் தான். ஆனால் படத்தைப் பார்க்கும்போது, நல்ல கதையை, வேறு யாரோ கதை புரியாமல் இயக்கியதைப் போல உள்ளது. அழுத்தம் இல்லாத வசனம், யதார்த்தமற்ற காட்சிகள், நிலையில்லாத பாத்திரப் படைப்பு என்று படம் முழுக்க நிறைய ஓட்டைகள். முக்கியமாக படைத்தலைப்புக்கும் கதைக்கும் எந்த சம்பந்தமுமில்லை. சோவுடைய நகைச்சுவையும், அவர் எல்லாரையும் எடுத்தெறிந்து பேசும் பாணியும், முத்துராமன், சுப்பையா, மனோரமா ஆகியோரின் அருமையான நடிப்பும் படத்தில் உள்ள மிகச் சில நல்ல விஷயங்கள்.

சோவுக்கு ஏகாம்பரம் என்ற வக்கீல் குமாஸ்தா வேடம். ஹீரோ, வில்லன் எனப் பாகுபாடு இன்றி எல்லாரையும் வாரு வாரு வாருகிறார். அரசியல் பேசவில்லை என்றாலும் இப்படத்தில் இவருடைய வசனங்கள் அருமையாக ரசிக்கும்படி அமைந்துள்ளன.

ஏழை சுப்பையாவுடைய மகனும், போர்ட்டர் முத்துராமனுடைய மகனுமாகிய ரவிசந்திரன், கோடீஸ்வரப் பெண்ணான கே.ஆர்.விஜயாவைக் காதலித்து மணமுடிக்கிறார். அவரை ஏழை என்பதால் அவமானப்படுத்துகிறார் விஜயாவுடைய தகப்பனார் வி.எஸ்.ராகவன். அதனால் அவருடைய தொடர்போ பணமோ வேண்டாம் என ஒதுங்கி வாழ்கிறார் விஜயா. அவர் சாகும்போது எல்லா சொத்தையும் மாப்பிள்ளை பெயரில் எழுதி வைத்து விடுகிறார். பணம் ரவியின் மனத்தை மாற்றுகிறது. தீய பழக்கங்களுக்கு ஆளாகிறார்.  தந்தை,அண்ணன் மற்றும் மனைவியை ஒதுக்குகிறார். அவர் எப்படி மனம் திரும்பினார் என்பதே மீதி கதை.

வி.கோபாலகிருஷ்ணன், சி.ஐ.டி.சகுந்தலா, ராமதாஸ், தேங்காய் சீனிவாசன், சுருளிராஜன், சசிகுமார், குமாரி பத்மினி ஆகியோரும் படத்தில் நடித்துள்ளனர்.

இப்படம் 21 ஜூன் 1974யில் வெளிவந்தது.