கண்ணத் தொறக்கணும் சாமி

தாசரி நாராயணராவின் மூலக்கதைக்குத் திரைக்கதை-வசனம் எழுதியவர் பாக்யராஜ். இளையராஜாவும் கங்கை அமரனும் இணைந்து இசையமைத்த படம். ஆர்.கோவிந்தராஜ் இயக்கம். 14 ஏப்ரல் 1986யில் வெளியானது.

சோவுக்கு வேணு என்ற கதாபாத்திரம்; சிவகுமாருடைய நண்பராக வருகிறார். படம் முழுக்க தோன்றும் பாத்திரம். ரஜனி சோவுக்கு ஜோடி. நகைச்சுவை ரசிக்கும்படி உள்ளது. அரசியல் வசனங்களையும் அவ்வப்போது சோ அள்ளி வீசி நம்மைச் சிரிக்க வைக்கிறார்.

வேலை தேடி பட்டணம் வரும் சிவகுமார், வீடு வாடகைக்குக் கிடைக்க ஜீவிதாவுடைய போட்டோவை ஒரு கடையிலிருந்து வாங்கி, தம்முடைய மனைவி எனப் பொய் சொல்லி வீட்டை மனோரமாவிடமிருந்து வாடகைக்கு வாங்குகிறார். இதன் காரணமாக ஜீவிதாவுடைய  திருமணம் நின்று போகிறது. அவர் சிவகுமார் வீட்டுக்கே வந்து அவருடைய மனைவி என உரிமை கொண்டாடுகிறார். சிவகுமார் எதுவம் செய்ய முடியாமல் தவிப்பதே படத்தின் மிகப் பெரிய பகுதி. வில்லன்கள்-சண்டை-ஜீவிதா சிவகுமார் சேர்ந்து வாழ்தல் எனச் சுபமாகப் படம் முடிகிறது.

நல்ல கலகலப்பான படம்; சிறிது கூட அலுக்கவில்லை.

தலையணை மந்திரம்

ஆகஸ்ட் 15, 1984யில் வெளியான இப்படத்தை என். வெங்கடேஷ் இயக்கியிருந்தார். பாண்டியன், சுலக்ஷனா, சோ, வடிவுக்கரசி, செந்தில், வி.கோபாலகிருஷ்ணன்  போன்றோர் நடித்துள்ளனர்.


சோவுடைய தேவையற்ற படங்களில் இதுவும் ஒன்று. இப்படத்தில் இவருக்கு அரசியல் வசனங்கள் இல்லை; நகைச்சுவையும் சொல்லும்படியாக இல்லை. படம் முழுக்க வருகிறார். சபலப் புத்தியுள்ளவர் பாத்திரம். கிருஷ்ணன் எனப் பெயர். நாயகனுடைய தந்தை. வடிவுக்கரசி ஜோடி. இவர்தாம் ஒரு இளம் பெண்ணுடைய தந்தை என நம்பும்படி நகரும் கதையின் முடிவில் இவருடைய நண்பர்தாம் அப்பெண்ணுடைய தந்தை என்பதை அனைவருக்கும் உணர்த்தி, அப்பெண்ணின் தடைப்பட்டிருந்த திருமணத்தை நடத்தி வைப்பார் சோ.

படம் அறுவையிலும் அறுவை. கணவனைச் சந்தேகப்படும் மனைவி கணவன் உத்தமன் என்பதைக் கடைசியில் உணரும் கதை. 

உள்ளம் உருகுதடி

மே 18, 1984யில் வெளியான இப்படத்தை ஈரோடு என். முருகேஷ் இயக்கியிருந்தார். சுரேஷ், விஜி போன்றோருடன் சோவும் நடித்திருந்தார். இப்படத்தைப் பார்க்கும் வாய்ப்பு எனக்கு வாய்க்காததால் மேற்கொண்டு தகவல்கள் தர இயலவில்லை.