மல்லிகைப் பூ

என்.எஸ்.மணியம் எழுதி இயக்கி 4 டிசம்பர் 1973யில் வெளியான இப்படம் ஒரு முறை மட்டும் பார்க்கக்கூடிய வகையில் உள்ளது. இதில் சோவுக்குக் கௌரவ வேடம். முனியாண்டி என்ற கிராமத்தான் வேடம். மனைவியாக மனோரமா; நகைச்சுவை சொல்லிக் கொள்ளும்படியில்லை.

முத்துராமன் வேலை செய்யும் இடத்தில், முதலாளி பெண்ணைக் (பிரமீளா) காதலிக்கிறார். அதையறியும் முதலாளியான வி.எஸ்.ராகவன் தம்முடைய மனைவியான சுகுமாரி மூலம் சில பொய்கள் கூறி முத்துராமனை நகரத்துக்கு அனுப்பி விடுகிறார். அங்கே வில்லன் ஸ்ரீகாந்துக்குப் பயந்து ஓடி வரும் கே.ஆர். விஜயா இவரிடம் தஞ்சம் புகுகிறார். ராகவன் சதி செய்து பிரமீளாவுக்கு வேறு இடத்தில் திருமண செய்ய முயல்கிறார். அதை அறியும் முத்துராமன் சந்தர்ப்ப சூழ்நிலையால் விஜயாவைத் திருமணம் செய்து கொள்கிறார். ஆனால் இதையறியாத பிரமீளா ஊரை விட்டு ஓடி வந்து விடுகிறார்; முத்துராமனுடைய பட்டணத்து முதலாளியான ஸ்ரீகாந்துடைய மனைவிதான் விஜயா என பிரமீளா சில காரணங்களால் நம்புகிறார். அவர் விஜயாவிடம் வேலைக்காரியாகச் சேர்கிறார். பல குழப்பங்களுக்குப் பிறகு, விஜயா நல்லவர்; முத்துராமன் சந்தர்ப்ப வசத்தால் விஜயாவைத் திருமணம் செய்து கொண்டார், ஸ்ரீகாந்த் திட்டமிட்டு விஜயாவைத் துரத்துகிறார் போன்ற உண்மைகள் தெரிகின்றன. பிரமீளாவே வில்லனைக் கொன்று, தானும் உயிரை விடுகிறார். தேங்காய் சீனிவாசன், சுருளி ராஜன், ராமதாஸ் போன்றோரும் படத்தில் உண்டு.

பாடல்களும் இசையும் சுமார் ரகம்; காட்சியமைப்புகளும் வசனங்களும் சுமாரே.